Comu na cumedia

A zzotta

Tempi maliritti

Ascùta a mmia

U porcu rrisulutu

Stu munnu

'N CINTU

Nun ni pozzu propriu cchiù

U pianinu

Curtigghiu

Carissima cumari

LA COPPULA

A STUVALA

A campana

U ritrattu

U ritrattu

Nun lassu mai 'ntravagghiu
e cercu i fallu sempri miegghiu;
nun arrizzu mai nu gigghiu, (1)
ma quannu talìu a tia tuttu m'ambrogghiu.

'N mumentu mai nun perdu,
ogni 'mprisa pi prima la 'ntravardu, (2)
d'o passatu tanti cosi m'arrivordu,
ma quannu talìu a tia tuttu mi scordu.

Aiu statu a tanti banni, (3)
aiu giratu menzu munnu,
aiu vistu cosi ranni,
ma quannu taliu a tia tuttu cunfunnu.

Nun sugnu tantu riccu.
pacienzia aiu cchiù i nu sceccu,
curaggiu n'aiu 'nsaccu,
ma quannu talìu a tia restu ri stuccu.

Pi tia tuttu tralasciu,

jocu, 'mpegni e tutti i trusci, (4)
ma u ritrattu tua mai u finisciu
pirchì taliannu a tia nun ci'arriniesciu.

Nello Benintende

_____________________________________
1- Sempre disponibile.
2- Pianifico ogni progetto.
3- Luoghi.
4- Faccende varie.

Tiatrinu

Stu munnu a ‘n tiatrinu m’assumigghia

unni ognunu la so parti s’arritagghia,

sicuru di scartàrisi la miegghia

è certu ì cumparìri a maravigghia.

C’è cu anserta la vintura

e cu vivi di sbintura,

cu firrìca menza nura

e cu ffa bbona fiura.

Cu pasci da gnuranti,

cu vvivi da briganti,

cu ssordi n’ha abbunnanti,

e cu vvivi senza nenti.

C’è cu sapi tanti cosi,

cu travagghia senza posa,

cu n voli essiri di pisu,

E cu si senti i siri ntisu.

Cu fa guerra e parra i paci,

cu fa liggi e nun ha vuci,

cu cunsighhia tagghia e cuci,

e i fari ‘mpassu nn’è capaci.

“U parcuscenicu e di tutti”!

A scena è sempri chidda,sia di iornu ca di notti.

Ognunu accanza tutti i so diritti…

ma d’o cupiùni ciascunu si nni futti.

: I tiatristi fanu i parti cu pirizia.

C’è cu ancuraggia e cu ti spranza,

cu t’alliscia e cu ti scanza,

cu ti riri e cu t’allanza,

e iù c’assistu cca davanzi,

nun sacciu cchiù a ccu a dari addenzia.

Calu a tila pi nun mìriri stranizzi,

e, a ssulu, la me parti fazzu

comu megghiu pozzu,

circannu di nun fari cosi i pazzi.

Nello Benintende

Agosto 2006

A canzuna de' Canali

A lu bon sensu

A lu bon sensu

Cunsàti ‘ntàrmunu di prima classi

c’ha murùtu n’ommu i lussu.

N’ha lassatu ‘lu bon sensu’!..

U dduluri è troppu ‘ntensu.

L’ha mmazzatu lu ‘dirittu’

ccu ppiacìri i l’ommu stortu.

‘Nputennu fari tistamentu,

ni lassàu ‘nto malabbentu.

Purtannusi ‘a raggiuni e la pacienzia,

amu persu la musura e la cuscienzia.

Comu agnieddhi a mmenzu ’e lupi ni truvimmu

E comu triricinu a mmenzu a stuppa ni sintimmu..

S’ha gnilatu u munnu tuttu !

Comu signu di rannissimu rispiettu,

pi l’anticu omu di crianza,

‘nc’è ri cchiù i l’antica usanza.

Ramu ‘o miegghiu catalettu n’allustrata

E ‘nsèmmuli facimmuci a nuttata.

Scuràmu specchi, chiurèmu a’mposta;

lassàmu sulu a luci i quantu abbasta.

Cu tri parrìni la missa cantata;

prieddica lonca, netta e sintùta;

cannìli e sciùri ‘nta tutti i scalùni;

cu sintimentu i tocchi i campani.

Paràmu ‘ncònsulu riali’ a cumpimentu,

e ppi tri jorni purtàmu u luttu strittu.

Ma quannu semu a l’accumpagnamentu,

cu l’urfaneddi e a banna nn’anzittuttu…

r’o chianu de’ Canali s’ha passari;

e nu ggiummu, ppi favuri… a mia lassatilu purtari!

Nello benintende

- 2007 -

Buccheri

Buccheri

‘Nta muntagna c’è ‘mpaìsi

unni Ddiu fi’ tanti cosi.

.Cci sturiau pi tanti misi

cummattennu senza posa,

Senza mai barari a spisi,

u vurcanu suttamisi,

e ‘nte petri fi’ maìsi, [1]

ciuri,ceusi e girasi,

u castieddu e a lifisa,

aria frisca e beddi crièsi,

vecchi, giuvini e carusi,

scali e conchi co’ gginìsi[2] n’ogni casa.

Fi’ nivieri assai ‘nciniusi.

Antuppau tutti i purtusi.

Arrizzittà tanti cuntisi;

Ccu ssurari mai s’arrisi.

E ppi fallu cchiù amurusu

ritagghiau sita turchìsi,

misi stiddi pi cimusa,

e quattru nivuli c’i appisi.

Ascutannu ogni pritìsa,

i Canali po’ cci misi;

e pinsannu ‘o Pararisu,

a stissa forma Iddu cci resi..

nello benintende

2005

---

1) Semina

2) Carbonella

L'ummira

L’ummira

Sempri cu mmia, sempri nu riscursu.

Si mi sbrazzu mi fai u versu,

si camimu vieni appressu

mantinennu u stissu passu.

Criru, e senza forsi,

ca mi giru e mi fai fissa.

ca i segreti mia vannu rispersi.

Ma ha’ finutu i fari a sarsa!

Aiu truvatu u giustu versu:

astùtu a luci, e iu t’abbersu!!

Unni si, vieni cca, unni si spersa;

mi sentu ‘mmenz’o sbersu,

‘nciummi senza cursu,

comu 'mpezz’ i lignu jarsu

comu misu pi traversu;

‘ngozzu[1] ‘mmari spersu.

Mi pari ca u munnu va a riversa,

mi scantu macari ‘i fari‘mpassu,

Ura m’arrennu, è veru, lu cunfessu,

pirchì senza ri tia mi sentu persu !

( Nello benintende )

---

1) Barca tipica.